➦ பள்ளி மாணவர்களிடையே, தமிழ்மொழித் திறனை மேலும் வளர்த்து செம்மைப்படுத்தி, மொழிப்பாடத்தில் கூடுதல் அக்கறை செலுத்தும் வகையில், தமிழ்த்தேனீ என்னும் பெயரில் மொழிப்பயிற்சி நூற்களை ஆயத்தம் செய்து, பள்ளியின் வழியே மாணவர்களுக்குக் கொண்டு சேர்த்தலே பன்னாட்டு மொழி & திறன் வளர் கழகத்தின் நோக்கம் ஆகும் .
➦ தமிழ் ஆசிரியர்கள், ஒவ்வொரு கல்வியாண்டிலும், தமக்கு ஒதுக்கப்பட்ட பாடநேரங்களில், அந்த அந்த வகுப்புகளுக்குரிய பாடத்திட்டத்தை, நாள்தோறும் வகுப்பில் தெளிவுறச் சிறப்பாக, நடத்தி வருகின்றார்கள்.
➦ தமிழ்த்தேனீ குழுவில் உள்ள, தமிழ்ப் பேராசிரியர், தமிழறிஞர் குழுவால், தமிழ்ப் பாடநூலுக்குத் துணையும் அணியும் சேர்க்கும் வகையில், வகுப்பில், தமிழ் மொழிப்பாடத்தை எடுத்துப் பயிலும் மாணவர்களுக்குத் தனித்தனியே, வகுப்பிற்கேற்ற, தமிழ்மொழிப் பயிற்சிப் புத்தகங்கள், ஆயத்தம் செய்யப்பட்டு, செம்மைப்படுத்தப்பட்டு, மாணவர் உலகத்திற்கு பணிவோடு அளித்து வருகிறோம்.
➦ மாணவர்கள், தேர்வில் பெறுகின்ற மதிப்பெண்களை உற்றுநோக்கின், பிற பாடங்களைக் காட்டிலும் தமிழ், ஆங்கிலம் போன்ற மொழிப்பாடங்களில் பெறும் மதிப்பெண்கள் சற்றே குறைந்து காணப்படுவதைக் காண்கிறோம்.
➦ குறிப்பாக, தாய்மொழியாக தமிழ் இருந்தும், தமிழ் மொழிப்பாடத்தில் மதிப்பெண்கள் குறைவதற்குக் காரணம் ஒற்றுப்பிழை, சந்திப்பிழை ர, ற - ல, ள, ழ - ன, ண, ந-கரப் பிழைகள், ஒருமை-பன்மை பிழைகள், வேற்றுமைப் பிழைகள், சொற்றொடர்ப் பிழைகள் மற்றும் இலக்கணப் பிழைகள் நிறைந்து காணப்படுவதாலேயாகும்.
➦ மேலும் அடிப்படை இலக்கணத்தைச் சரிவரப் புரிந்து கொள்ளாதலால், தமிழில் எழுதும்போது பிழைகள் மிகையாகக் காணப்படுகின்றன. தேர்வு எழுதும்போது மாணவர்களின் மதிப்பெண்கள் வெகுவாகக் குறைகின்றன.
➦ 'தமிழ்த்தேனீ' மாணவர்களுடைய தமிழ்மொழித் திறனை மென்மேலும் வளர்க்கும் வகையில், வகுப்புப் பாடநூற் திட்டச் சிறப்பியல்களை உள்ளடக்கி, அவர்களுடைய தமிழ் மொழி ஆர்வத்தைத் தூண்டும் வகையில், அடிப்படை இலக்கணத்தின் தழுவலோடு, பல்வேறு சுவையான பயிற்சிகளை, இவ்வொன்பது நூற்தொகுதிகளில் அளிக்கிறது.
➦ தமிழ்மொழியில் சிறப்பாக, நீரோட்டமாக வாசிக்கவும், புதிய சொற்களைக் கற்கவும், சிந்திக்கவும், உச்சரிக்கவும் மற்றும் பிழைகளின்றி அழகுற எழுதவும் 'தமிழ்த்தேனீ ’ துணை செய்கிறது.